Focus

Përpjekjet për ta ruajtur gjuhën e Krishtit. Aramaikja e lashtë drejt zhdukjes

Në Maalula të Sirisë, një prej vendbanimeve më të vjetra të krishtera të globit, vendasit druhen se aramaikja e lashtë, gjuha e Jezu Krishtit, mund të mos mbijetojë dot, sepse ajo ka nisur tashmë të zhduket ngadalë nga përdorimi i përditshëm.

Maaloula, qytet i banuar nga të krishterë, në periferi të Damaskut

Një nga personat e fundit në këtë fshat të specializuar në gjuhën e hershme është 62-vjeçari George Zaarour.

Dikur aramaikja përdorej gjerësisht në Maalula, e kjo është edhe arsyeja që ekzistoi për 2000 vite, por sot janë të paktë ata që dinë ta flasin.

“Gjuha aramaike është vërtet në rrezik. Nëse gjërat vazhdojnë kështu, ajo mund të zhduket brenda 5 apo 10 vitesh”, tha George Zaarour.

Zaarour mbledh libra dhe enciklopedi në gjuhën aramaike në dyqanin e tij të vogël, ku shet ikona, kryqe, e madje edhe produkte të bëra në shtëpi.

George Zaarour

Ai i kalon ditët e tij duke studiuar dhe përkthyer këtë gjuhë të lashtë semite, e cila ka qenë mjaft e përhapur në Lindjen e Mesme në fillimin e epokës së krishterë, ndërsa origjina i daton që në shekullin e X përpara Krishtit.

Sot, 80 për qind e banorëve të Maalulës nuk flasin më këtë gjuhë, ndërsa ata që bëjnë pjesë te 20 përqindëshi i mbetur janë mbi 60 vjeç.